Solasplitten blir lyst ut på anbod i dag

Statens vegvesen lyser i dag ut vegprosjektet Solasplitten på anbod. Fristen for entreprenørane til å komme med tilbod på bygginga er sett til den 30. april. [22.03.2010]

Samferdsleminister Magnhild Meltveit Kleppa ga i forrige veke klarsignal for at anbodsrunden kunne starte, så sant endeleg sluttfinansiering blir godkjent i Stortinget i juni.

I forrige veke blei det kjent at Solasplitten er rekna til å bli meir enn 10 % dyrare enn det som Stortinget har godkjent. Reglane seier då at ein ny godkjenning må til før prosjektet kan starte.

Bygging i august
– Vi er svært glade for at vi kan starte anbodsprosessen nå, seier byggeleiar i Statens vegvesen, Dag Johannes Daland.
– Det betyr at vi truleg kan signere ein kontrakt med entreprenøren 1. juli, og dermed komme i gang med bygginga i august.

Ferdig 2012
Arbeidet med Solasplitten skal etter planen starte i aust, på strekninga mellom E39 og Åsnuten.
– Går alt etter planen nå, skal Solasplitten stå ferdig 1. september 2012, seier Daland.

Fv. 510 Solasplitten er ein ny veg mellom Stavanger lufthavn (Sømmevågen) og E39 nord på Forus. Vegen skal avlaste dagens fv. 510 Nesbuvegen og gi ein god forbindelse mellom Stavanger lufthavn/Risavika og E39.