Elektro-kontrakt på Hardangerbrua

Statens vegvesen har inngått kontrakt med danske KB electrotech om gjennomføring av elektro-entreprisen på Hardangerbrua. [10.11.2011]

Storparten av arbeidet gjeld installasjonar i tunnelane fram til brua, inkludert oppgradering av den 26 år hamle Vallaviktunnelen. Kontraktsummen er på 59,7 millionar kroner.

Etablert i Norge
- Vi tek sikte på å etablera oss med kontor og lagerplass i Vallavik før jul, seier salsdirektør Knud Balle i KB electrotech, etter signering av kontrakta i lag med prosjektleiar Øivid L. Søvik i Statens vegvesen.
Danskane sitt siste veg-oppdrag i Norge var utrustinga av E6 Eidsvolltunnelen, der det var vegopning nyleg. Dei har hatt elektro-oppgåva på tilsaman 8 tunnelar i Norge, mellom anna på Finnfast-prosjektet i Rogaland. Elles driv dei med elektroinstallasjonar på industri-anlegg, som meieri og bryggeri, og har også vore med på flyplass-utbygging i Danmark.

Ein del nattestenging
Elektro-arbeidet på Hardangerbrua vil pågå fram til våren 2013. Ein tek sikte på å gjennomføra arbeidet i Vallaviktunnelen med ein del nattestenging og med kolonnekøyring på dagtid når arbeidet kjem i gang ut på nyåret 2012.
Gjennom 2012 og 2013 vil det og bli ei samkøyring mellom arbeidet i Vallaviktunnelen og rassikringa i Eddegjelet på fv. 572 mellom Bruravik og Ulvik, slik at ferjetrafikken mellom Bruravik og Brimnes kan sleppa fram utan for store forseinkingar på nordsida av fjorden.