Prosjektomtale

I midten av 1980-åra kom så planane om Nordøyvegen som skulle bygge alle øyane saman. Eksempelet med dei undersjøiske Ålesundstunnelane inspirerte også Nordøyane til å prøve det same. Nordøyvegen har hatt høg prioritet i Møre og Romsdal blant dei prosjekta som ligg i planane under "Nye fylkesvegar".

Nordøyvegen vil gi fast vegsamband til Lepsøya, Haramsøya, Skuløya/Flemsøya og Fjørtofta i Haram kommune og Harøya og Finnøya i Sandøy kommune i Møre og Romsdal. Prosjektet omfattar fire fjordkryssingar og opprusting/omlegging av noverande hovudvegar på øyane til tofelts riksvegstandard. Nordøyane vert i dag trafikkert av to fylkesvegferjesamband og ein hurtigbåt.

Nordøyvegen vil gi fastlandssamband for rundt 3200 menneske. Dei rundt 10000 innbyggjarane i Haram og Sandøy blir samstundes knytt nærare saman gjennom fast vegsamband. Med fast vegsamband vil ein spare transportkostnader for næringslivet og private og få eit meir fleksibelt transportsystem.

Prosjektet omfattar tre fjordkryssingar og opprusting/omlegging av noverande hovudvegar på øyane til tofelts riksvegstandard:

• Bru/fylling Skjeltene (fastlandet)–Lausundholmen (Lepsøya)–Hestøya; og tunnel Hestøya–Austnes (Haramsøya)
• Tunnel Nogva (Skuløya/Flemsøya)–Stongnes (Fjørtofta)
• Tunnel Kongsnes (Fjørtofta)–Myklebust (Harøya)

Total tunnellengde: 11 km

Bruer: Høgbru over skipsleia i Løvsøyrevet med lengde 750 meter og seglingshøgde 41 meter. To lågbruer i sjøfyllinga mellom høgbrua og Lepsøya på 100 meter (har ikkje seglingløp) og 200 meter med seglingshøgde på 7 meter.

Konsekvensutgreiing og kommunedelplan for prosjektet er gjennomført og vart godkjent i 2006.