Bakgrunn for prosjektet

Auke i trafikken

Det har vore sterk vekst i næringsutvikling, særleg i oljerelatert verksemd, og auke i folketal og bustadbygging på Sotra og i Øygarden dei siste 10-15 åra. Dette har ført til sterk auke i trafikken mellom Sotra og Bergen. Sidan Sotra/Øygarden og Bergen har felles bustads- og arbeidsmarknad, er det stor og gjensidig/tovegs transportaktivitet mellom Bergen og kommunane i vest.

Dårleg kapasitet

Rv. 555 Sotrabrua med tilførselsvegar er det einaste sambandet mellom Sotra/Øygarden og Bergen. Trafikkmengda over Sotrabrua er ca. 23000 i årsdøgntrafikk (ÅDT). Trafikken på tilførselsvegnettet til Sotrabrua overstig i dag det som vegsystemet har kapasitet til. Det er periodevis store køar på sambandet over Sotrabrua, mellom Straume i vest til Storavatnet i aust.

Sårbart

Eksisterande samband er såbart ved ulukker, motorhavari etc. Ved slike hendingar er det særs vanskeleg når køyretøy skal køyre forbi. Ein følge av dette er full stans i trafikken med lange køar.