Stortinget vedtok i november 2018 at utbetringa av riksveg 36 frå Bø til Seljord kunne gjennomførast med bompengar.

Reguleringsplanen vart godkjend i 2014, og hausten 2018 vart planane noko endra.

Til saman er det tre kilometer av riksvegen langs Seljordsvatnet som vert utbetra. Utbetringane har ei ramme på nær 300 millionar kroner, og vert finansiert med bompengar.

Entreprenør Hovden Hytteservice AS gjer jobben

Konkurransegrunnlaget vart sendt ut på nyåret 2019 og utbetringa starta hausten 2019. Hovden Hytteservice AS fekk kontrakten på nesten 122 millionar kroner inkludert meirverdiavgift.

Anleggsdrifta er i full gang

Anleggsdrifta kom i gang september 2019. No vert det bygt ny veg på to strekningar langs Seljordsvatnet. Sett i retning frå Bø mot Seljord er det bygt ny veg på strekningen halvannan kilometer før Sanden camping ved Stodi. Den andre strekningen er Buktiparsellen etter campingplassen, der det òg er om lag halvannan kilometer veg som byggjast ny.

Det er og mykje arbeid med sprenging på Buktiparsellen. Store fjellpallar ved vegen skal sprengast vekk, og det krev at vegen må stengast i periodar.

1. mai 2020 opna vegen etter å ha vore stengd sidan 6. januar. Personbilar må i stengetida køyre på vestsida av Seljordsvatnet, om Garvikstrondi. Tunge køyretøy må bruke E134 om Notodden og Hjartdal.

Stenging av vegen er avgjerande for å halde god framdrift på prosjektet. Stodiparsellen vart klar til 1. mai då vegen vart opna igjen.

Ferdig i mai 2021

Det vil gå føre seg noko vegarbeid på rv. 36 i sommar og. Arbeidet med ny rasteplass og toalettanlegg vil halde fram. Vegen vil verte stengd att frå 1. desember og fram til vegen opnar 1. mai 2021.