Departement og direktorat på synfaring
Som ledd i Kommunal- og moderniseringsdepartementet sitt arbeid med å konkludere i planlegginga av ny E39 mellom Heiane og Ådland/Nordre Tveita, vart det 25. oktober arrangert møte og synfaring på Stord.
Både Kommunal- og moderniseringsdepartementet, Samferdsledepartementet, Klima- og miljødepartementet, Vegdirektoratet og Miljødirektoratet, i tillegg til Statens vegvesen, Fylkesmannen i Hordaland og Stord kommune var representert då motsegnene til kommunedelplan for E39 Heiane–Ådland/Nordre Tveita vart drøfta sist måndag.
Vegvesenet orienterte om planane og våre motsegner til desse, Stord kommune gjorde greie for sine ynskjer, og Fylkesmannen i Hordaland gjekk gjennom sine motsegner og si tilråding i saka. Etter innlegga gjekk møtedeltakarane ut i terrenget der dei fekk sett aktuelle område både i Landåsen og ved Tveitastølen, på Heiane og ved Ådlandsvatnet.
- I etterkant av møtet vil dei aktuelle direktorat og departement gjere si vurdering av saka, før statsråden sjølv skal konkludere, opplyste sakshandsamar i Kommunal- og moderniseringsdepartementet Frode Davidsen. Vidare opplyste Davidsen at ein må rekne med minimum fire månadar frå synfaringa til endeleg avgjersle vert fatta.
-
Bilde 1 av 4: Møtedeltakarane var på synfaring, mellom anna på skogs- og turvegar i Landåsen, der dette biletet er teke. (Foto: Sindre Lillebø, Statens vegvesen) Foto: Sindre Lillebø -
Bilde 2 av 4: Visualiseringa syner planalternativ 2 med ny E39 nærast mogeleg dagens europaveg. Dette er alternativet som Fylkesmannen har rådd til å velje. -
Bilde 3 av 4: Visualiseringa syner planalternativ 4 med veg i dagen gjennom Landåsen, sett frå sørvest/Heiane. Dette er alternativet som Statens vegvesen har tilrådd. -
Bilde 4 av 4: Visualiseringa syner planalternativ 5 med tunnel under Landåsen, sett frå sørvest/Heiane. Det er dette alternativet kommunen ynskjer seg.