Køyr for å overleve

Unngå overraskingar ved å bruke blikket systematisk til å sjå etter dårleg vegdekke, grus, andre trafikantar som kan bli ei utfordring, og kvar vegen går vidare.

Søk blikkontakt med føraren når ein bil står i eit kryss og ventar når du nærmar deg. Slik kan du sikre at føraren har sett deg. Det er likevel ingen garanti, så ver på vakt når du køyrer vidare.

Når du ser dit du vil køyre, styrer du motorsykkelen meir presist på vegen.

Det er meir sannsynleg at du kjem heilt fram om du har fleire løysingar for situasjonar som oppstår i trafikken. Ha til dømes ein plan for kva du vil gjere dersom ein bil som har vikeplikt og har stoppa, plutseleg køyrer likevel.

Gå ned i fart om du har kortare sikt framover når du ser inn i svingen. Når svingen opnar seg og du kan sjå lenger fram igjen, kan du auke farten.

Dei fleste trur sannsynlegvis at dei senkar farten tilstrekkeleg før svingar. Det gjeld også dei som køyrer av vegen.

Tilpass farten etter forholda. Hugs at du skal rekke å stoppe dersom det skjer noko uventa. Står det eit køyretøy som sperrar vegen i ein uoversiktleg sving, må du kunne stoppe.

Ikkje køyr for fort. Motorsykkelen er mindre enn dei fleste køyretøy, så han er vanskelegare å oppdage. Med høg fart, blir han endå vanskelegare å oppdage. I trafikksituasjonar der du forventar at andre skal overhalde vikeplikta, må du sørgje for at dei rekk å sjå deg.

Ikkje plassar deg på sida av køyretøy inn mot kryss og rundkøyringar. Det gjer deg lite synleg – og det kan redusere di eiga oversikt over trafikken. Plasser deg i køyrefeltet slik at du ser og er synleg for andre trafikantar.

Sørg for å ha trygg avstand til køyretøya framfor deg, på sida og om mogleg bakover. Då får du tid og plass til å rette opp feil. Du har også betre oversikt og blir sett av andre.

Plasser motorsykkelen slik at andre trafikantar ikkje er i tvil om kva du vil gjere vidare. Skal du svinge, så plasser deg tydeleg i den retninga du skal. Skal du rett fram, så plasser deg slik at dette er tydeleg.