Statens vegvesen tilbyr vêrdata, reisetider, kamerabilete og trafikkmeldingar via DATEX II.

DATEX er ein europeisk standard for utveksling av trafikkinformasjon mellom ulike aktørar og baserer seg på XML-meldingar. DATEX står for «DATa EXchange between traffic and travel information centres». 

Vi tilbyr for augeblinken informasjon om vêr, reisetider, kamerabilete og trafikkmeldingar på DATEX II versjon 3.1-format. Tenesta er gratis å bruke.

DATEX-publikasjonar

Her finn du informasjon om publikasjonane frå DATEX-noden til Statens vegvesen. Alle publikasjonane er publiserte som pull-tenester.

Vêrdata

Publikasjon

Publikasjonen for vêrdata består av to publikasjonar, éin for måleverdiane og éin for den geografiske posisjoneringa av vêrstasjonane. Når du formidlar informasjonen vidare, ber vi deg vise til Statens vegvesen som kjelde.

Du må registrere deg for å ta i bruk lenkene.


Måleverdiar

Publikasjonen består av meteorologiske måleverdiar frå vêrstasjonar langs riks- og fylkesvegnettet i Noreg. Vi oppdaterer han kvart tiande minutt.

Geografisk posisjon

Publikasjonen oppgir den geografiske posisjonen til vêrstasjonane i form av koordinatar, vegnummer og målestasjonsnamn.

Har du innspel?

Send oss gjerne tilbakemeldingar eller forslag til forbetring av vêrdatapublikasjonen på e-post.

Webkamera

Webkamera-publikasjonen overfører oppdaterte bilete frå kamera langs vegane. Desse gir brukaren eit inntrykk av trafikkflyt, vêr og føreforhold.

Statens vegvesen har sett opp webkamera mange stader langs vegnettet. Dette er oftast på vêrutsette stader, ferjeleie, fjellovergangar og i tettstader med mykje trafikk.

Bileta frå kameraa blir oppdaterte med varierande frekvens. Dette har samanheng med typen kamera, og korleis kommunikasjonen med kameraet er sett opp.

Enkelte av kameraa vekslar mellom å vise forskjellige retningar og vegbanar. Det vil seie at dei kan endre bileteutsnitt mellom oppdateringar.

Drift og vedlikehald

Mange av kameraa står på vêrharde stader, og frå tid til anna kan dei vere ute av drift. Det kan skyldast straumbrot, feil i kommunikasjonen med kameraet eller annan teknisk svikt. Det kan ta tid før servicemannskap finn feilen og får retta han. Derfor kan eit kamera iblant vere ute av drift i nokre dagar eller vise eit gamalt bilete.

Publikasjon

Webkamera-publikasjonen gir tilgang til alle webkameraa. Når du formidlar informasjonen vidare, ber vi deg vise til Statens vegvesen som kjelde.

Du må registrere deg for å ta lenka i bruk.


Personvern

Webkameraa er sette opp for å gi brukarane eit inntrykk av trafikale forhold som køsituasjon, vêr og føreforhold. Kameraa tar ikkje bilete av enkeltpersonar, og det skal ikkje vere mogleg å identifisere personar eller registreringsnummera til køyretøy på bileta.

Ta kontakt med oss på e-post dersom du oppdagar bilete som ikkje tar nok omsyn til personvernet, eller dersom du har andre tilbakemeldingar om tenesta.

Reisetider

Reisetider-publikasjonen inneheld reisetider i sekund mellom to målepunkt. Vi oppdaterer reisetida for alle delstrekningar kvart femte minutt.

Publikasjonen inneheld reisetider for

  • hovudvegnettet rundt Oslo, Bergen, Stavanger, Kristiansand og Trondheim
  • E18 frå Oslo til Aust-Agder
  • E6 frå Ås til Kolomoen
  • E8 frå Skibotn til finskegrensa

Publikasjon

Reisetider-publikasjonen består av to publikasjonar, éin for måleverdiane og éin for den geografiske posisjoneringa. Du må registrere deg for å ta i bruk lenkene.


Måleverdiar

Publikasjonen inneheld reisetider for heile landet. Mottakar må sjølv filtrere på by/stad. Publikasjonen inneheld målte reisetider i sekund, og vi oppdaterer han kvart femte minutt. Forseinkingar blir rekna ut i forhold til manuelt bestemte normalreisetider for strekningane.

Geografisk posisjon

Publikasjonen inneheld strekningsgeometri, namn og identifikator for strekningane vi måler reisetid på. Vi oppdaterer publikasjonen når det skjer endringar på plasseringa av målestasjonar eller strekningar.

Skildring av datasettet

Informasjonen vi bruker til å generere reisetider, hentar vi inn ved hjelp av antenner langs vegen. Antennene registrerer passeringar av køyretøy med AutoPASS-brikker.

Utrekning av reisetider

Reisetider blir genererte ved at målestasjonar registrerer eit anonymt dataelement i AutoPASS-brikkene. Brikkedata for to stasjonar som følgjer etter kvarandre blir så sette saman til ei enkeltreise. Reisetida blir rekna ut som eit gjennomsnitt av reisetida for køyretøy som har køyrt ei gitt strekning innanfor eit intervall på fem minutt.

Algoritmen som reknar ut reisetider, tar omsyn til fleire faktorar. For eksempel vil svært korte og svært lange reisetider bli kasta. Forseinkingar blir rekna ut mot ei manuelt målt normalreisetid. Normalreisetida er ofte basert på fartsgrensa, men lokal kunnskap om trafikken på ei strekning kan føre til at vi justerer normalreisetida.

Vi måler ikkje reisetid i kollektivfelt. Vi skil heller ikkje på reisetidene for ulike typar køyretøy, som privatbilar og lastebilar.

Måling av strekningar

Det er målepunkt for reisetider i Oslo, Bergen, Trondheim, Stavanger og Kristiansand. I tillegg er det målestasjonar langs E18 frå Oslo til Agder, langs E6 frå Ås til Kolomoen og på E8 frå Skibotn til finskegrensa.

Det er dei største pendlarårene i og rundt byene som er dekte med registreringspunkt, sidan det er på desse strekningane det er flest framkomstproblem.

Vising av forseinkingstrend

Det følgjer med eit flagg som viser forseinkingstrenden, det vil seie om det er aukande, stabil eller avtakande forseinking på ei strekning. Dette er til bruk for informasjonstavler eller kartvising av køsituasjonar.

Har du innspel?

Send oss gjerne tilbakemeldingar eller forslag til forbetring av reisetider-publikasjonen på e-post.

Trafikkmeldingar

Denne publikasjonen deler informasjon om forhold på eller langs vegane som kan føre til forseinkingar eller forhøgja ulykkesrisiko i trafikken.

Vegarbeid, mellombels trafikkregulering, som stengingar, trafikkuhell, uvêr, ras og flom, er blant dei tinga som kan påverke trafikkavviklinga. Vi publiserer kontinuerleg meldingar vi får om slike forhold, og sender dei ut på DATEX II-format. 

Publikasjon

Vi gir ut trafikkmeldingar i ein publikasjon som dekkjer heile landet. Når du formidlar informasjonen vidare, ber vi deg vise til Statens vegvesen som kjelde.

Du må registrere deg for å ta lenka i bruk.


Dekning

Publikasjonen dekkjer forhold som kan påverke trafikken på offentlege vegar i Noreg.

Kvalitet

Statens vegvesen tar imot, verifiserer og distribuerer løpande informasjon om forhold som kan påverke trafikken. Vi oppgir så godt det er mogleg, tida frå noe skjer, til informasjonen blir distribuert, den geografiske posisjonen til det som skjer, og nøyaktigheita av informasjonsinnhaldet.

Filtrering

Publikasjonen inneheld informasjon om alle forhold, noverande og planlagte, som kan påverke trafikken. Det er informasjon frå heile landet. 

Dersom du bruker Trafikkmeldingar-publikasjonen, kan du bruke filter for å avgrense informasjonsmengda om eitt spesifikt tema. Dette kan til dømes vere ulykker, vedlikehald eller tilstand. Du kan lese meir om korleis ein kan filtrere i DATEX-spesifikasjonane.

Kven kan bruke DATEX?

DATEX-tenesta er tilgjengeleg for media, ulike tilbydarar av trafikkinformasjon og andre aktørar som er interesserte i å nytte informasjon frå Statens vegvesen i sine eigne tenester. Bruken er regulert av norsk lisens for offentlege data.

For å få tilgang til DATEX-informasjon må du først bestille tilgang. Deretter kan du ta i bruk publikasjonane våre. Når du bestiller tilgang, registrerer vi deg som DATEX-brukar. Dette gjer det mogleg for oss å informere deg om oppgraderingar og andre grunnar til at noden kan vere nede. 

Lær å bruke DATEX

Hos DATEX II Academy finn du rettleiingar, spesifikasjonar og annan informasjon som kan vere til hjelp når du skal bruke DATEX II.

Dokumentasjon og eksempeldata

Følg lenka for å laste ned DATEX-dokumentasjon, til dømes oversikt over endepunkt, gjeldande publikasjonar og og tilhøyrande skjema (wsdl). Du kan også sjå eksempeldata for publikasjonar, som viser strukturen til dataa og moglegheitene dei gir.

Nyttige funksjonar

Det er ei rekke funksjonar som kan vere nyttige å kjenne til når du jobbar med DATEX-publikasjonar.

Sjekk om ein publikasjon er endra

Du kan bruke headerlinja «If-Modified-Since» for å sjekke om ein publikasjon er endra sidan eit oppgitt tidspunkt.

Sjå UML-modellen

UML-modellen viser datarelasjonane i DATEX-modellen for den gitte spesifikasjonen.

Trafikkinformasjon som WMS/WFS

Du kan vise DATEX-data i kart via WMS/WFS.

Sjå DATEX-data på Vegvesen trafikk

Vegvesen trafikk er ei teneste frå Statens vegvesen med trafikkinformasjon. Ho publiserer mellom anna DATEX-DATA i kart.

Lurer du på noko?

Kontakt oss på e-post dersom du ønskjer meir informasjon.


Viktige meldinger