Kom trygt i gang med øvingskøyringa

Før du kan øvingskøyre

Før du kan ta køyretimar eller øvingskøyre privat, må du ta trafikalt grunnkurs hos ein trafikkskule eller som valfag i 10. klasse. Når du har fullført kurset, får du eit bevis som gir deg rett til å øvingskøyre. 

Sjå også: Vegen til førarkortet

Dersom du er over 25 år

Dersom du har fylt 25 år, er du fritatt frå delar av trafikalt grunnkurs og kan køyre utan øvingskøyringsbevis. Trafikant i mørket (mørkekøyring) og Plikter ved trafikkuhell og førstehjelp er obligatorisk for alle og må vere gjennomført før oppkøyring.

Øvingskøyring i din førarkortklasse

Når du skal øvingskøyre, må de sørgje for å ha rett utstyr, køyretøyet må vere merkt rett, og de må køyre på eigna stader.

Sjå reglane for førarkortklassen din

Har du sperrefrist eller tapt førarrett?

Då kan du ikkje øvingskøyre før du har fått godkjenning og skriftleg løyve frå politiet.

Tips til trygg øvingskøyring

Start opplæringa hos ein trafikkskule

Dette gir eit godt grunnlag for vidare opplæring og privat øvingskøyring. Ta gjerne med deg den du skal øvingskøyre med, på den første køyretimen.

Bruk god tid på øvingskøyringa

Du må øvingskøyre mykje for å bli ein trygg trafikant. Tar du førarkortet for første gong, bør du bruke minst to år på opplæringa før du tar oppkøyring. 

Køyr på eit nivå du meistrar

Du må ta omsyn til kor langt du er komen i opplæringa. Unngå øving i tett trafikk og høg fart før du er god nok til å følgje trafikkrytmen. Øvingskøyring må ikkje vere til fare eller unødig ulempe for annan trafikk. På avsperra område kan du køyre utan følgje så lenge den som er med deg, ser deg heile tida og kan instruere.

Ver frisk og opplagd når du skal køyre

Du må ikkje øvingskøyre dersom du er rusa, trøytt, sjuk eller på annan måte svekt. Når du øvingskøyrer, gjeld krav til helse (Lovdata) både for deg og den som øvingskøyrer med deg.

Ikkje betal nokon for å øvingskøyre med deg

Det er berre lærarar ved trafikkskular eller godkjende kursarrangørar som kan ta betalt for opplæring.

Den du øvingskøyrer med 

Sjåføren som følgjer deg når du øvingskøyrer, må ha fylt 25 år og ha hatt førarkort i same førarkortklasse i minst 5 år.

Sjå informasjon til følgjepersonar under øvingskøyring

Øvingskøyring og mørkekøyring

For å øvingskøyre mellom 1. november og 15. mars må du ha gjennomført Trafikant i mørket (mørkekøyring). Tar du trafikalt grunnkurs mellom 16. mars og 31. oktober, får du eit øvingskøyringsbevis som berre gjeld i denne perioden av året. Når du har tatt mørkekøyring, får du eit nytt øvingskøyringsbevis som gjeld heile året.

Les meir om Trafikant i mørket

Øvingskøyring i utlandet

Reglane våre for øvingskøyring gjeld berre i Noreg. Dersom du ønskjer å øvingskøyre i utlandet, må du følgje reglane som gjeld for øvingskøyring i landet du er i. Reglane om øvingskøyring er ulike i alle land. For å øvingskøyre i til dømes Sverige må følgjepersonen ha gjennomgått særskild opplæring og registrert seg hos styresmaktene.