Likestillingsplan 2025–2027 – Gender Equality Plan

Verdigrunnlaget vårt for styrking av likestilling og mangfald viser også til FN sitt berekraftsmål nr.5, Likestilling mellom kjønna.

Målsetting

I Statens vegvesen har vi som mål at arbeidsmiljøet skal vere attraktivt og utviklande for alle medarbeidarar uavhengig av kjønn, etnisitet, religion, funksjonsevne, seksuell orientering eller alder. Likestilling skal praktiserast slik at det bidrar til at alle medarbeidarar skal ha same moglegheit til kompetanse- og karriereutvikling.

Tiltak for å fremje likestilling og mangfald

Statens vegvesen har tiltak for å fremje likestilling og hindre diskriminering; ved rekruttering, ved tilrettelegging for personar med nedsett funksjonsevne, ved tilrettelegging ved graviditet og amming, foreldrefråvær, omsorgsoppgåver og gjennom ein eigen seniorpolitikk.

Rekruttering

Statens vegvesen kunngjer ledige stillingar i fleire ulike kanalar, og har ei mangfaldserklæring i utlysingsteksten. Vi har utvikla ein eigen mangfaldspolicy som er ein del av rekrutteringsprosessen.

Denne krev at kvalifiserte søkjarar frå underrepresenterte grupper blir innkalla til intervju og at alle kvalifiserte søkjarar får likeverdig behandling. Vi har ei bevisst haldning om å inkludere menneske med nedsett funksjonsevne og fleirkulturell bakgrunn.

Vi speglar befolkninga godt ved at 8.6 prosent (i 2024) av medarbeidarane våre har innvandrarbakgrunn. Andelen har auka jamt årleg frå 6.9 prosent i 2020. Vi arbeider også målretta, og i samarbeid med NAV, med rekruttering av arbeidssøkjarar med nedsett funksjonsevne. Andelen tilsette frå denne gruppa har variert mellom 2.6 og 6.3 prosent dei siste fire åra, og i 2025 er måltalet sett til 4 prosent.  

Oppfølging og tilrettelegging ved svangerskap, fødsel eller adopsjon

Statens vegvesen kan ved behov tilby tilrettelegging i samråd med bedriftshelsetenesta for gravide medarbeidarar. I tråd med fråsegnene i Hovudtariffavtalen kan vi tilby betalte ammepausar, varetaking av lønsutvikling på lik linje med andre medarbeidarar og velferdspermisjon, med eller utan løn, for medarbeidarar med utvida omsorgsoppgåver.

Tiltak for å motverke trakassering og diskriminering

Statens vegvesen har ei klar haldning mot trakassering og diskriminering. Dette er forankra i dei personalpolitiske retningslinjene våre, i etiske retningslinjer og i lønspolitikken. Vi har eigne retningslinjer for handtering av mobbing, trakassering, konfliktar og diskriminering. Som det er

pålagd oss gjennom arbeidsmiljølova har vi også varslingsrutinar som kan brukast dersom nokon opplever trakassering eller diskriminering.

HR jobbar fortløpande med temaet likestilling og mangfald; gjennom leiaropplæring, informasjon i interne media, med kurs og ved rekruttering.

Lovverk, aktivitet- og forklaringsplikt

Forbodet mot diskriminering i arbeidslivet er regulert i likestillings- og diskrimineringslova.  Verksemdene sine plikter er nyleg (2021) forsterka gjennom aktivitets- og forklaringsplikta (ARP). Arbeidsmiljølova, Hovudavtalen i staten og anna statleg regelverk, inkludert særavtalar for verksemda vår, er førande for arbeidet vårt.

I tilpassingsavtalen til Hovudavtalen for Statens vegvesen blir likestilling omtalt slik i § 31:

«Mål og tiltak for å øke likestilling skal være integrert i etatens mål- og resultatledelsessystem. Evaluering av resultater og avklaring av nødvendige tiltak skal på vanlig måte skje i linjen. Arbeidsoppgaver som gir utvikling, økt kompetanse eller som på andre måter bidrar til å kvalifisere til avansement, må fordeles slik at kvinner og menn får samme grunnlag for karriereutvikling.»

Eit anna døme er personalreglementet for Statens vegvesen som gir klare føringar på at ein skal prøve å oppnå kjønnsbalanse i dei ulike organa som er knytte til rekrutteringsprosessen.

Oppfølging av bemanningsstatistikk gir eit viktig kunnskapsgrunnlag for eventuell iverksetting av korrigerande tiltak. Ei anna viktig kunnskapskjelde er medarbeidarundersøkingar som blir gjennomførte jamleg. På individnivå er dei viktigaste kjeldene til kunnskap om eventuelle avvik klagar eller varslingar til leiar, HR, tillitsvalde eller vernetenesta. Klagar og varslingar blir handterte i samsvar med vedtatte rutinar.

Ansvar og ressursar knytte til arbeidet med likestilling og mangfald

Leiarane i Statens vegvesen har ansvar for å kjenne til, og ta i bruk, dei retningslinjene og verktøya vi har for å fremje likestilling og mangfald, og å hindre diskriminering. Tillitsvalde og vernetenesta er viktige samarbeidspartnarar. HR har eit særleg fagleg ansvar for å sjå til og følgje opp at dette arbeidet er ein integrert del av personalforvaltinga, og i rekrutteringsarbeidet spesielt.

Status for likestilling mellom kjønna i Statens vegvesen

Status for likestilling og mangfald blir rapportert årleg til Samferdselsdepartementet. Tabellen viser kjønnsbalansen i dei ulike stillingskategoriane. Kategoriar med færre enn 40 medarbeidarar er utelatne frå tabellen. Tabellen viser også lønsbalansen mellom kjønna.

Ved utgangen av 2024 var kvinneandelen på 39 prosent. Andelen kvinner har vore stabil over mange år.

Kvinner tener i snitt mindre enn menn. Den kjønnsdelte utdannings- og arbeidsmarknaden gjer seg tydeleg gjeldande også i Statens vegvesen. I den største stillingskategorien, teknisk saksbehandlar, utgjer andelen av kvinner 25 prosent, medan andelen er 61 prosent i den nest største kategorien, merkantil saksbehandlar.

Lønsutviklinga over tid er positiv. Løna til kvinner utgjorde 91 prosent av løna til menn i 2017, og auka til 97 prosent i 2024. I den største stillingsgruppa som også er klart mannsdominert er det no balanse lønsmessig. Tilbake i 2017 utgjorde kvinner sin andel av menn si løn 96 prosent i gruppa tekniske saksbehandlarar. I 2020 var løna lik, og i 2022 gjekk kvinnene forbi mennene lønsmessig. 

Over mange år har det vore ei målsetting i Statens vegvesen at andelen kvinner i leiarstillingar minst skal svare til kvinner sin andel av alle tilsette. Denne målsettinga har vore oppfylt i fleire år, og i 2024 steig andelen kvinner i leiarstillingar til heile 47 prosent. God kjønnsbalanse blant leiarane gir ein god peikepinn på at moglegheitene for karriereutvikling er gode for begge kjønn i Statens vegvesen.

Oslo, 22. august 2025

Jane Bordal
HR-direktør
Statens vegvesen