Ansvar og oppgåver
Statens vegvesens ønskjer å gå føre i utviklinga av eit effektivt, sikkert og heilskapleg transportsystem tilpassa morgondagens behov og teknologi.
Ansvaret for riks- og europavegane og for trafikantar og køyretøy gjer Statens vegvesen til den største aktøren innan vegtransport i Noreg. Med to tredelar av trafikken dannar riks- og europavegane sjølve hovudpulsåra i transportsystemet og bind landet vårt saman. Statens vegvesen har ansvaret for å planleggje og byggje, drifte og halde denne delen av vegnettet ved like.
Vi tek vare på heilskapen
Statens vegvesen har eit særleg ansvar for å ta vare på heilskapen i vegsektoren. Dette gjer vi mellom anna gjennom vårt nasjonale ansvar for beredskap på vegane. Vi tek òg vare på heilskapen ved å utvikle tydelege regelverk og standardar for smart transport og moderne vegbygging, som gjeld for alle vegeigarar i Noreg.
Gjennom arbeid og tilsyn med trafikantar og køyretøy, ny teknologi og utvikling av digitale tenester, vil vi sikre trafikantane og næringslivet enkle, effektive, trygge og miljøvenlege transportmoglegheiter.