600 meter breitt gjerde sikrar skredutsett område ved Gudvangen

Statens vegvesen er i gang med å sikra det skredutsette området Kjerrskredene ved Gudvangen.

Eit nesten 600 meter breitt og seks meter høgt fanggjerde vert no sett opp. Arbeidet skal etter planen vera ferdig innan slutten av mai.

Mesta er entreprenør for prosjektet som har ein kontraktssum på 17,4 millionar pluss moms.

Kjerrskredene ligg like sørvest for Gudvangen inst i Nærøyfjorden og ytst i Nærøydalen i Aurland  kommune.

Store delar av Nærøydalen, mellom anna Kjerrskredene, ligg innanfor Nærøyfjorden landskapsvernområde. Statens vegvesen har på plass dei nødvendige dispensasjonane for å jobba i området som har høg skredfaktor.

Trafikkreguleringa undervegs i arbeidet er i utgangspunktet lysregulering og kortare venting.

Fanggjerdet som vert sett opp her, er breiare enn det som i haust vart sett opp ved Legene mellom Flåm og Aurlandsvangen. Dette gjerdet var 70 meter breitt.