Slik syklar du trygt

Hald god avstand, gi tydelege teikn og tilpass syklinga etter veg, sikt og trafikk. Ta ekstra omsyn når du syklar i ei gruppe.

Bruk hjelm og sørg for at sykkelen er i god stand. Les meir om krav til bremsar, dekk, lys og refleks her:

Følg med på vegdekket og trafikken framfor deg. Hull, grus, vind og andre hindringar kan gjere at du må bevege deg sidevegs.

Store køyretøy og blindsone

Køyretøy, som bussar og lastebilar, har store blindsoner. Ver merksam ved å

• unngå å liggje tett inntil køyretøyet
• ikkje liggje på innsida av store køyretøy som kan svinge
• plassere deg slik at du er mest mogleg synleg for føraren
• halde avstand og vere førebudd på å stanse

Grøn sportsbil og raud buss i by. — Foto: Henriette Erken Busterud/Statens vegvesen

Når køyretøy skal passere

Hald ei føreseieleg linje. Ikkje sykle så langt ut mot kanten at det blir utrygt.

Vink berre nokon forbi om du er heilt sikker på at vegen er fri. Den som køyrer forbi, har sjølv ansvar for å avgjere om det er trygt.

Fire syklistar på rad på trafikkert veg i by. — Foto: Knut Opeide/Statens vegvesen

Gode råd når de syklar i gruppe

Ved gruppesykling, gjeld dei same trafikkreglane som når du syklar åleine. I tillegg tilrår vi at gruppa opptrer samla og føreseieleg.

• Unngå plutselege endringar i fart eller retning.
• Gi tydelege teikn til andre trafikantar.
• Sykle maks to i breidda.
• Varsle andre i gruppa om hindringar.
• Trekk heile gruppa ut av køyrebanen om de må stanse.
• Del gruppa for å sleppe annan trafikk forbi ved behov.

Ei gruppe med fire vaksne syklistar i vegbanen. Dei syklar to og to i breidda. — Foto: Henriette Erken Busterud/Statens vegvesen

Hamner de fleire syklistar saman i gruppe i kvardagen, kan de sykle inntil to i breidda. Vis omsyn ved å sykle på éi rekkje når forholda gjer det nødvendig for tryggleiken, eller for å sleppe trafikken forbi på smale eller uoversiktlege vegar. Omsynet gjeld også når de nærmar dykk eit vegkryss utan eige sykkelfelt.

Søk blikkontakt med bilistane når du skal krysse ein veg eller avkøyring.

Tre personar syklar på veg i by - ein gut, ein mann og ei kvinne. — Foto: Henriette Erken Busterud/Statens vegvesen

Når sykkelgruppa må stanse

Om de må stoppe, bør de trekkje heilt ut av køyrebanen dersom det er mogleg. Vel ein stad der

• de er synlege
• de ikkje står i vegen for trafikken
• gruppa kan samlast utanfor køyrebanen

Rundt sju syklistar på rad i brusteinsgate ved ei kai. Blå himmel og ferje i bakgrunnen. — Foto: Henriette Erken Busterud/Statens vegvesen

Som syklist er du mindre synleg enn bilar og meir utsett for ulykker. Ta ingen sjansar!