Vikepliktreglar når du syklar

Er du usikker på kven som har vikeplikt, er det tryggast å bremse eller stanse heilt.

Sykling i køyrebanen eller i sykkelfeltet

Sykler du i køyrebanen eller i sykkelfeltet, skal du følgje vikepliktreglane for køyrande.
Det betyr at du har vikeplikt for

• køyrande som kjem frå høgre, dersom du ikkje er på forkøyrsveg
• alle køyrande på ein forkøyrsveg du skal inn på (skilta vikeplikt)
• motgåande køyretøy som du får på høgre side av deg når du svingar til venstre
• gåande som er i gangfelt eller er på veg ut i det
• køyretøyet i feltet du skal inn i eller må krysse

Om det er trafikklys eller skilta vikeplikt der du syklar, gjeld dette framfor regelen om vikeplikt frå høgre. Då har du vikeplikt frå begge sider i første kryss etter skiltet. Er trafikklyset ute av drift, gjeld eventuelt vikepliktskilt eller høgreregelen.

Er du i tvil om bilførarar eller andre køyrande har sett deg og kjem til å stoppe? Ver varsam og senk farten. 

Vikeplikt for syklistar i gangfelt

Du er ikkje nødt til å gå av sykkelen over eit  gangfelt, men vikepliktreglane er ulike etter som du syklar eller trillar sykkelen. Syklar du over eit gangfelt, har du vikeplikt for bilane på vegen. Om du går av sykkelen og trillar han over gangfeltet, har bilane vikeplikt for deg. 

Krysse frå sykkelveg, gang- og sykkelveg eller fortau 

Når du syklar frå sykkelveg, gang- og sykkelveg eller fortau og skal krysse eller svinge inn på ein annan veg, har du vikeplikt for all trafikk på vegen.

Du har ikkje vikeplikt for dei som kjem køyrande til eller frå ein inn- eller utkøyrsel til eigedom, parkeringsplass eller liknande område.

Kven har vikeplikt når eg byter felt?

Når du skiftar køyrefelt, har du vikeplikt for køyrande i feltet du syklar inn i eller må krysse.
Du har også vikeplikt når du syklar inn på vegen frå vegkanten eller vegskuldra.

Sykling i rundkøyring

Når du syklar inn i ei rundkøyring, har du vikeplikt for trafikken som er i rundkøyringa. Skal du skifte felt inne i rundkøyringa, har du vikeplikt for køyretøy i feltet du vil inn i. Plasser deg godt synleg i køyrebanen og gi tydeleg teikn slik at andre forstår kvar du skal. 

Forbikøyring på sykkel

Forbikøyring på sykkel skal som hovudregel skje til venstre. Som syklist kan du likevel køyre forbi eit anna køyretøy på høgre side, men ikkje ein annan syklist eller elsparkesyklist. Forbikøyring på høgre side kan vere aktuelt forbi stilleståande eller saktekøyrande kø.

Venstresving på sykkel i kryss

Når du syklar og skal svinge til venstre i eit kryss, kan du velje mellom to måtar å ta venstresvingen på:

• Liten venstresving – sving til venstre som andre køyrande.
  Plasser deg helst til venstre i køyrefeltet ditt, eventuelt i midten, og gi tydeleg teikn før du svingar. Du har vikeplikt for motgåande køyretøy som du får på høgre side.
• Stor venstresving – kryss vegen i to etappar.
  Sykle rett fram til den andre sida av krysset. Stans og sjekk at det er klart før du syklar inn på vegen til venstre.