E16 stengd aust for Dale 11. oktober

Publisert

Laurdag 11. oktober skal den siste portal-seksjonen på Dalseidtunnelen støypast. Dette betyr at E16 vert stengd frå laurdag kl. 07.00 til ca. 12.00 søndag.

Den fjerde og siste støypen på den nye rassikringsportalen på Dalseidtunnelen skal utførast laurdag 11. oktober.

Slik som sist, må europavegen haldast stengd medan betongen går i forma og det herdar. Tunnelen vil vere stengd for all trafikk, utanom utrykkingskøyretøy i aktiv utrykning.

Stengd til søndag føremiddag

E16 blir stengd ved Dalseidtunnelen frå kl 07.00 på morgonen laurdag 11. oktober. Det er venta at vegen vil bli opna igjen innan klokka 12.00 søndag føremiddag.

Frå støyp av nest siste seksjon, 20. september 2025.
Frå støyp av nest siste seksjon, 20. september 2025. Foto: Statens vegvesen

Omkøyring for gjennomgåande trafikk blir via Hardanger på fv. 49, fv. 79 og rv. 13 på ruta Trengereid – Norheimsund - Granvin.

Vegvesenet skal ha trafikkdirigentar på Voss og i Trengereid for å sikre at gjennomgåande trafikk kjem inn på omkøyringsruta. Fylkeskommunen vil også ha trafikkvakter som følgjer med på trafikken, og set i gang dirigering ved behov.

Ved svært dårlege vêrmeldingar, kan støypen bli flytta fram ei veke, til 18. oktober.