God framdrift på tunnelane

Det er stor aktivitet på båe sider av fjorden. På Vallavik er det drive kring 150 meter tunnel. Opninga mot brua og fjorden er godt synleg frå motsett side. Det same har tunnelsalvane som har vore sprengte fram mot munninga dei siste vekene. Her har det og vore utført vaierskjæring av fjellsida i tunnelmunninga. Portalen er no knappe 10 meter høg, men vil seinare i vår bli utvida til ei høgde på 22 meter, som er eineståande høgt som tunnelportal.

Som kjent skal portalen formast som ein trompet fram på sidespennet på Hardangerbrua, eller Gjallarhorn, som denne løysinga blir kalla mellom anleggsfolka som driv tunnelen i desse dagar.

Tunnelarmen frå rv. 13 på Bu-sida for den framtidige brutrafikken mellom Eidfjord og brua har hatt god inndrift, og det er her sprengt  kring 100 meter tunnel på drøye to veker. Entreprenøren har dermed kring 150 meter att før ein er framme der det skal lagast rundkøyring i tunnelen. Her vil dei to trafikkstraumane til og frå Hardangerbrua møtast, trafikk på rv. 13 til og frå Kinsarvik og Odda og trafikk på rv. 7 til og frå Eidfjord.

Det er og klart for driving av denne tunnelen frå andre enden – frå fjordsida på Bu. Dette gjeld både vegtunnelen mot dei to tunnelarmane og ein kort tunnel for gang- og sykkelvegen til og frå Hardangerbrua.