Søk om verkstadkort

For at nettsidene skal fungere best mogeleg for deg, må du aktivere JavaScript i nettlesaren din. Her finn du rettleiing til korleis du aktiverer JavaScript i nettlesaren (ekstern lenke).

Du kan også bruke nettsidene utan å aktivere JavaScript. Bruk søket eller naviger ved hjelp av nettstadskartet.

Vekstadkort er nødvendig for mekanikarar som skal arbeide med digital og smart fartsskrivar på ein godkjend fartsskrivarverkstad.

Søk om verkstadkort Logg inn på Di side

Det er verkstaden som er korteigaren, og mekanikaren som er kortbrukar. Verkstadkortet er gyldig i 1 år. Ein mekanikar som arbeider for fleire verkstader, skal ha eitt verkstadkort for kvart verkstad. Verkstadkortet er personleg og skal ikkje lånast bort.

Merk at ansvarleg leiar/stadfortredar må ha enkeltrettinga «Gjennomgå søknad om verkstadkort» i Altinn for å fullføre søknaden. Dagleg leiar må òg sjekke at rett tilsett er registrert som ansvarleg leiar/stadfortredar i Verkstadregisteret.

De kan søkje om nytt eller fornye verkstadkort på Di side. Dersom verkstadkortet er tapt, øydelagt eller må bytast ut på grunn av administrative endringar, må de søkje på ein trafikkstasjon.

Slik søkjer de om verkstadkort på Di side

Mekanikar søkjer om verkstadkort

Mekanikaren som skal bruke verkstadkortet, loggar inn og søkjer om kortet. Dersom verksemda du jobbar i har fleire avdelingar, må du hugse å velje den avdelinga du jobbar for. Du treng ingen enkeltrett i Altinn for å søkje på vegner av verksemda.

Fornye verkstadkort

Du kan også fornye verkstadkortet på Di side. Når du allereie har eit verkstadkort, vel du «Forny». Du skal altså ikkje søkje om eit nytt verkstadkort. Hugs å sjekke at verkstadsnamnet er riktig.

Ansvarleg leiar eller stadfortredar må fullføra søknaden

Tilgang til å fullføre søknaden

Den tilsette må vere registrert som ansvarleg leiar eller stadfortredar i Verkstadregisteret. Les meir om korleis dagleg leiar kan oppdatere Verkstadregisteret.

I tillegg må ansvarleg leiar eller stadfortredar ha enkelrettinga «Gjennomgå søknad om verkstadkort» på vegner av verksemda i Altinn for å kunne bruke denne løysinga.

Manglar du rettar i Altinn, må du ta kontakt med den som er registrert som ansvarleg for verksemda i Altinn. Det er som regel dagleg leiar, styreleiar eller andre med rolla «tilgangsstyring» i Altinn som kan gi tilsette eller andre rettar til å handle på vegner av verksemda.

Stadfeste og betale

Ansvarleg leiar må fullføre søknaden om verkstadkort ved å stadfeste opplysningane frå søkjaren og betale. Verkstadkort kostar 360 kroner når de søkjer via Di side.

Søknaden blir behandla

Etter at ansvarleg leiar har fullført søknaden, blir ho behandla og kortet blir vanlegvis produsert innan 48 timar (på vyrkedagar). Både mekanikar og ansvarleg leiar kan sjekke status på søknaden på Di side. Alle som bestiller verkstadkort etter 24. oktober 2025 får ein digital PIN-kode.

Verkstaden får tilsendt verkstadkortet innan to veker etter bestilling. Mekanikar får SMS-varsel med informasjon om PIN-kode når kortet er sendt.

Dagleg leiar gir ansvarleg leiar/stadfortredar tilgang

Dagleg leiar bør sjekke at rett tilsett er registrert som ansvarleg leiar eller stadfortredar i Verkstadregisteret. For å ha tilgang til å sjå og søkje om å endre ansvarleg leiar, må dagleg leiar ha enkelretten «Verkstad og kontrollorgan – søkje om ny eller endre godkjenning» i Altinn på vegner av verksemda.

Ansvarleg leiar/stadfortredar må ha enkelretten «Gjennomgå søknad om verkstadkort» på vegner av verksemda i Altinn for å fullføre søknaden om verkstadkort på Di side. Les meir om korleis du kan gi tilsette eller andre rettar til å handle på vegner av verksemda i Altinn.

Slik søkjer de om verkstadkort på ein trafikkstasjon

De må søkje på ein trafikkstasjon dersom

verkstadkortet må bytast ut på grunn av administrative endringar
de har eit verkstadkort som er tapt eller øydelagt, og treng eit erstatningskort

Søknadsskjemaet for verkstadkort må skrivast ut, fyllast ut, signerast av både kortbrukar og ansvarleg leiar, og leverast ved personleg oppmøte av kortbrukar på ein trafikkstasjon. Du må bestille time før du møter opp, og ta med gyldig legitimasjon. Det kostar 390 kroner å søkje om verkstadkort på ein trafikkstasjon.

Etter at du har søkt om verkstadkortet på trafikkstasjonen, blir verkstadkortet og PIN-kodebrevet sendt til verkstaden. Namnet til kortbrukaren (mekanikaren) vil stå utanpå konvolutten.

Mekanikar får SMS varsel med informasjon om PIN-kode når kortet er sendt.

Verkstaden får verkstadkortet og PIN-kodebrevet innan to veker etter bestilling.

Vilkår for å få verkstadkort

Statens vegvesen sjekkar om dei nødvendige vilkåra for å få verkstadkort er oppfylte. Dette inkluderer mellom anna å sikre at arbeid på ein smart fartsskrivar blir utført av ein verkstad somer godkjent for dette føremålet. Dersom det ikkje går klart fram i Einingsregisteret om verkstaden oppfyller krava, kan Statens vegvesen be om meir informasjon frå ansvarleg leiar.

Verkstadkort som er utferda på grunnlag av uriktige opplysningar, vil bli tilbakekalla av Statens vegvesen. Det same gjeld ved bruk av ein annan sitt verkstadkort, forfalsking eller anna bruk i strid med forskrift om fartsskriververksteder. Dersom kortbrukar sluttar ved verkstaden før verkstadkortet går ut, skal ansvarleg leiar levere kortet (utan PIN-kode) til Statens vegvesen (ved oppmøte på trafikkstasjon eller ved å sende det til returadressa). Dette er for å sikre at kortet ikkje blir brukt av andre.

Informasjon om PIN-kode

Alle som bestiller verkstadkort etter 24. oktober 2025 får ein digital PIN-kode.

PIN-koden vil vere synleg når kortet er send frå produsent.

Dersom kortet er bestilt på ein trafikkstasjon, vil PIN-koden også bli send som vanleg brev til adressa til verkstaden.

Feil eller defekt kort

Dersom det kan dokumenterast at verkstadkortet inneheld feilaktige opplysningar som skuldast forhold hos Statens vegvesen eller kortprodusenten, blir det utferda eit erstatningskort utan ny betaling. Dette gjeld også dersom verkstadkortet er defekt av tilsvarande grunnar, eller PIN-kode ikkje er mottatt.

Oppbevaring av kort og PIN-kode

Kortet har ein personleg PIN-kode. For kvart nytt verkstadkort får du ein ny kode. Du kan taste feil kode fire gonger. Den femte gongen vil verkstadkortet bli øydelagt. Då må du søkje og betale for eit erstatningskort.

Verkstadkortet og PIN-koden skal oppbevarast kvar for seg og på ein trygg måte. Kortbrukar er ansvarleg for at verken kort eller kode kjem uvedkomande i hende. Verkstadkortet skal ikkje brukast av andre enn den som står som kortbrukar for kortet, og PIN-koden skal ikkje gjerast kjent for andre. Verkstadkortet skal oppbevarast nedlåst i eit sikkerheitsskap eller liknande i tilknyting til verkstaden når det ikkje er i bruk. Det er ikkje tillate å låne bort verkstadkortet. Krava følgjer av forskrift om fartsskriververksteder § 17.

Fornying av verkstadkort

Fornying kan gjerast når verkstadkortet er i ferd med å gå ut (innan 3 månader), eller har gått ut for mindre enn 1 år sidan. Det er kortbrukaren sitt ansvar å søkje om fornying i god tid før datoen det eksisterande verkstadkortet går ut, for å sikre at ein har eit gyldig kort. Startdatoen på det nye kortet er dagen etter sluttdatoen på det gamle kortet. Gyldig kort skal brukast fram til datoen då det går ut, og det nye kortet må IKKJE setjast inn i fartsskrivaren før startdatoen på kortet.

Dersom ein mekanikar har eit verkstadkort som kan fornyast, blir det sendt ut eit SMS-varsel til mekanikaren to månadar før kortet går ut.

Erstatning av verkstadkort

Erstatningskort kan utferdast dersom kortet har blitt stole, tapt eller defekt. I slike tilfelle må mekanikaren levere inn søknad om erstatningskort og opplyse om at kortet er tapt, stole eller defekt. Han må også opplyse når kortet slutta å fungere eller vart tapt/stole (dato), og skrive ei skriftleg forklaring på hendinga. Dersom verkstadkortet er tapt eller stole, skal dette meldast til Statens vegvesen utan ugrunna opphald. Tapsmelding må leverast på ein trafikkstasjon. Dersom kortet kjem til rette etter at kortbrukar har fått erstatningskort, skal det tidlegare verkstadkortet straks sendast til Statens vegvesen (returadresse står bak på kortet), eller leverast inn på ein trafikkstasjon.

Dersom det blir søkt om erstatningskort fordi det tidlegare kortet er defekt, skal dette kortet leverast inn på ein trafikkstasjon saman med søknaden. Ein kan også søkje om erstatningskort dersom verkstadkortet inneheld feilaktige opplysningar, til dømes feil namn, adresse eller liknande. Ved slike tilfelle skal det gamle verkstadkortet leverast inn til Statens vegvesen saman med søknaden. Alternativt kan ein hente nytt verkstadkort på trafikkstasjonen og då levere inn det gamle kortet samtidig.

Kortbrukar skal melde frå til verkstaden dersom det er mistanke om at kortet har blitt misbrukt.

Du må bestille time når du skal på ein trafikkstasjon.

Utskifting av verkstadkort

Dersom kortbrukar endrar namn eller liknande etter å ha mottatt verkstadkortet, kan ein søkje om nytt verkstadkort med riktige opplysningar. Dersom ein søkjer om utskifting med ein tidlegare startdato enn sluttdatoen på det gamle verkstadkortet, skal det gamle kortet leverast inn til Statens vegvesen saman med søknaden. Alternativt kan ein hente nytt verkstadkort på trafikkstasjonen og då levere inn det eksisterande kortet samtidig.