E134 i Etne: Omfattande opprydding, ny vurdering onsdag
Det er eit stort og krevjande oppryddingsarbeid som skal til, både i fjellsida og i vegen, før vegen kan opnast att etter raset.
Det er klart etter at Statens vegvesen sin geolog har gjort ei første vurdering av situasjonen på rasstaden søndag ettermiddag.
- Det står att eit fjellparti høgt oppe i fjellsida som vi må få undersøkt stabiliteten i, seier Svenn Egil Finden, avdelingsdirektør for drift og vedlikehald i Statens vegvesen.
Omfattande arbeid
- I tillegg må heile det lange og breie skredløpet undersøkast grundig for ytterlegare rasfare. Dersom det blir vurdert som trygt å sende eit klatrelag opp vil det bli gjort nærare undersøkingar av dette partia i morgon. Det er eit omfattande arbeid, der sikkerheita til mannskapa våre må stå i høgsetet. Det vi kan seia no er at oppryddingsarbeidet vil ta fleire dagar. På onsdag veit vi meir om når vi kan rekne med å kunne opne vegen, seier Finden.
Ser på ferjekapasiteten
Gjennom søndagen har det vore stor trafikk, ikkje minst på grunn av at det for mange er siste dag i vinterferien. Trafikkdirigentar har vore ute på fleire trafikknutepunkt for å dirigere og rettleie trafikantane.
- Vi undersøker også moglegheitene for å auke kapasiteten på ferjesambandet Nesvik-Hjelmeland på riksveg 13, seier Svenn Finden.
- Finn andre køyreruter
- Situasjonen vil gje utfordringar for trafikkavviklinga så lenge E134 er stengd. Vi rår alle trafikantar, ikkje minst tungbilane, til å vurdere andre køyreruter. E18 og E39 om Sørlandet bør vera aktuelt for mange. For trafikken som kjem nordfrå vil det vera mest aktuelt å køyre E16 til Bergen og deretter E39.
Sjå vegvesen.no/trafikk (175.no) eller appen Vegvesen Trafikk for oppdaterte trafikkmeldingar.