Gjer E134 Ølen-Mørkeli breiare, rettare og betre

Det etterlengta prosjektet varar etter planen to og eit halvt år.

Dette er prosjektet Ølen-Mørkeli

– Vi skal utbetra 6,3 km av E134 slik at vegen får gul midtstripe og forsterka vegoppmerking, som består av rumlefelt i midten og  på sidene, seier prosjektleiar Johannes Handeland i Statens vegvesen.

Fleire kurver skal rettast ut og det skal gjerast arbeid med sideterrenget for å betra sikta. I tillegg skal vegstrekket asfalterast og rekkverk skal utbetrast/skifast ut.

Etablering av kulvertar og tiltak i vassdrag/omlegging av bekker ligg også til jobben. Ei ny bru er også del av prosjektet, 

Trafikantane vert påverka i varierande grad gjennom anleggstida.

Vegen vil bli stengd i kortare periodar i samband med sprengingsarbeid. Det vil også bli nytta trafikklys på deler av strekninga. Manuell dirigering og nedsett fartsgrense er også aktuelle tiltak i byggeperioden.

– Vi har forståing for at dette kan mellombels verta krevjande for trafikantane, men hugs på at vi gjer dette for dei, for at vegen i området skal verta betre, slik det lenge har vore eit ønske om, legg Handeland til.

Vossa-firma er entreprenør på jobben som ligg både i Rogaland og Vestland

Prosjektet er finansiert gjennom Haugalandspakka og med statlege midlar. Her er Vegvesenet si prosjektside. 

Det er Vossa-firmaet Hirth Himle Entreprenør AS er hovud-/totalentreprenør på prosjektet, etter å ha levert eit tilbod på 164 millionar pluss moms.

Prosjektet kryssar både ei kommunegrense og ei fylkesgrense. Vindafjord ligg i Rogaland, medan Etne ligg i Vestland.