Statens vegvesen sender forslag til nytt løyveregister på høyring
Statens vegvesen sender no forslag om å etablere eit nytt nasjonalt løyveregister på høyring.
Målet er å gi transportnæringa enklare og meir brukarvennlege tenester, samtidig som styresmaktene får betre høve til oppfølging og kontroll.
– Vi ønskjer å gjere det enklare for transportørar å forhalde seg til løyvestyresmaktene. Det nye registeret vil gi betre oversikt over løyve, meir effektive sjølvbeteningsløysingar og leggje til rette for betre samhandling mellom offentlege styresmakter, seier Jan Erik Myhr i Statens vegvesen.
Det nye registeret, kalla Løyvesys, skal erstatte dagens løysing og er utvikla for å møte noverande og framtidige behov. Systemet skal bidra til meir automatisert kontroll av løyvevilkår og gjere det enklare å dele nødvendige opplysningar med andre relevante styresmakter.
- For transportørar og andre løyvehavarar vil Løyvesys gi tilgang til nye sjølvbeteningsløysingar, mellom anna betre oversikt over eigne løyve og enklare oppfølging av krav og vilkår, avsluttar Myhr.
Høyringa omfattar også forslag til endringar i yrkestransportlova, yrkestransportforskrifta og forskrift om gebyr for visse brot på yrkestransportregelverket.
Statens vegvesen foreslår vidare at Løyvesys på sikt skal brukast som felles løyveregister både for løyve som blir forvalta av Statens vegvesen og løyver som blir forvalta av fylkeskommunane.
Du finn høyringa her: Høyring om regelverksendringar knytte til nytt løyveregister for gods- og persontransport