Voss – Arna (KVU)
Konseptvalutgreiinga (KVU) for Voss– Arna omfattar strategiar for utvikling av denne transportåra fram mot 2050.
Samfunnsmålet som ligg til grunn for KVU-en var: I 2050 skal transporten i korridoren skje trygt og påliteleg med reduserte avstandskostnader som gir grunnlag for regional utvikling.
Avklaring frå Samferdsledepartementet
Samferdselsdepartementet bad Jernbaneverket og Statens vegvesen i brev datert 08.12.2015 legge felleskonseptet K5 til grunn for vidare planlegging med statleg reguleringsplan på strekninga Arna – Stanghelle.
KVU-oppdraget
Oppdraget frå Samferdsledepartementet vart gitt i brev datert 14.12.2011.
For å tilfredsstille krava i tunneldirektivet må heile strekninga Arna – Voss på E16 byggast ut.
Tilråding
Statens vegvesen og Jernbanedirektoratet tilrådde konsept «K5 Stor innkorting bane og veg – kombinasjonsløysing». Rapporten vart levert i april 2014, og KS1-rapporten var klar i desember same år. KS1-konsulenten tilrådde 0-alternativet sidan ingen av konsepta var samfunnsøkonomisk lønsame.
Bakgrunn for tilrådinga
Strekninga Voss – Arna hadde mange utfordringar, både på veg og bane. Kurvatur og standard elles var for låg, og parti på strekninga var utsette for ras. Trafikken på E16 var stor og aukande, og det har vore fleire alvorlege ulukker. Det har vore mykje stenging av dei gamle tunnelane på grunn av vedlikehald. Reisetida, både på veg og bane, var vesentleg lågare enn lengda skulle tilseie. Det prosjektutløysande behovet var behov for trafikksikker E16 og redusert reisetid og auka kapasitet for jernbanen.
Konsept K5 har god måloppnåing på reisetid, både for bane og veg. Det kjem nest best ut på trafikktryggleik. Skredutfordringane vert løyst både for bane og veg.
Innkorting av reisetid bane Voss-Bergen frå over 1 time og ned til 32 min. gir reduserte avstandskostnadar og grunnlag for regional utvikling. Reisetida i planområdet har også stor innverknad på den totale reisetida Oslo – Bergen.
K5 kjem dårleg ut på ikkje-prissette verknader (analyse basert på konfliktpotensiale).
Utbyggingskostnaden er ei stor utfordring ved K5. Parallell utbygging for veg og bane har totalkostnad på 33 mrd.kr. Dei samfunnsøkonomiske berekningane syner at alle konsepta kjem ut med negativ netto nytte.
Kvalitetssikring (KS1)
KS1-konsulenten tilrådde 0-alternativet sidan ingen av konsepta var samfunnsøkonomisk lønsame. 0-alternativet inneber at ein held fram med dagens veg og bane.